Барлық өңірге жаңа бозкілемдер сыйға беріледі

19

Жақында  Грек-рим, еркін және әйелдер күресі федерациясының президенті Сауат Мыңбаев пен Ұлттық Олимпиада комитетінің басшысы  Тимур Құлыбаевтың бастамасымен еліміздің барлық өңірлеріндегі спорт мектептерін арнайы кілемдермен жабдықтау қолға алынды, деп хабарлады Ұлттық Олимпиада комитетінің баспасөз қызметі.

Демеушілердің көмегімен атқарылып жатқан жоба келесі жылдың наурыз айына дейін жалғасады. Федерацияның есебі бойынша алдағы уақытта даму жағынан артта қалып жатқан аймақтарға 150-ден аса кілем үлестіру жоспарда бар. Соның 43-і қазірдің өзінде өз иелерін тапты. Атап айтсақ, Алматы қаласы, Солтүстік және Батыс Қазақстан, Қарағанды, Оңтүстік Қазақстан облыстарындағы аудандар кілеммен қамтамасыз етілді. Нақтырақ айтқанда, бүгінде Шахтинск (Қарағанды облысы) мен Жезқазған, Сатбаев (Қарағанды облысы) қалаларында және Теректі (БҚО), Сырым (Атырау облысы), Мамлют (СҚО) аудандарындағы балалар мен жасөспірімдерге арналған спорт мектептеріне арнайы кілем төсеніштері жеткізілген. Алдағы уақытта федерация басшылары еліміздің басқа да аймақтарына қол ұшын созып, жас палуандардың алаңсыз жаттығу жасауына жағдай жасамақ.

  • Күрес – еліміздегі ең танымал спорт түрлерінің бірі. Сондықтан қазіргі таңда Астана мен Алматы қалаларына және барлық 14 облысқа қарасты спорт мектептеріне тегін кілемдер үлестіріп, күрестің дамуына үлесімізді қосып отырмыз. Мұндай бастама Күрес федерациясы мен Спорттық жекпе-жек және күш қолданылатын спорт түрлері конфедерациясы, Ұлттық Олимпиада комитетінің қолдауымен жүзеге асып жатыр,— деді Грек-рим, еркін және әйелдер күресі федерациясының бас хатшысы Анатолий Волоха.

Грек-рим күресінен Бейжің Олимпиадасының күміс жүлдегері Нұрбақыт Теңізбаевтың айтуынша, федерацияның жүргізіп жатқан мұндай іс-шарасы еліміздегі күрестің дамуына оң ықпалын тигізеді.

Грек-рим, еркін және әйелдер күресі федерациясының мұндай бастама көтеріп, аймақтардағы күрестің дамуына оң ықпал жасап жатқанына қуаныштымын. Бәрімізде ауылда өстік. Болашақ чемпиондардың бәрі ауылдан шыққан. Сондықтан Федерация басшыларының алыс шалғайдағы ауыл-аудандарға көмек қолын созып, спорт мектептерін қажетті құрал-жабдықтармен қамтамасыз етіп жатқаны өте дұрыс, — деді Н.Теңізбаев.

Қазіргі таңда елімізде 130 мыңға жуық адам тұрақты түрде күрес түрлерімен айналысып жатыр. Осылайша, соңғы жылдары грек-рим, еркін және әйелдер күресі федерациясы елімізде күрес түрлерін дамыту жолында көптеген игі іс-шараларды қолға алып отыр. Бүгінде аймақтарда жас палуандардың күреспен шұғылдануына жақсы жағдай жасалған.

Дереккөз: SortPress.kz

قالب وردپرس

ПІКІР ҚАЛДЫРУ

Пікіріңізді жазыңыз!
Өтінеміз, аты-жөніңізді жазыңыз